Category: Uncategorized

– Um vit bera skjótt at, kunnu vit verja tey veiku, tey gomlu og ikki minst tey, sum eru ringast fyri í Afrika orsakað av korona og øðrum heilsutrupulleikum, sigur Roger Vassnes, sum er leiðari í norsku deildini hjá Mercy Ships.

Tað er meiri enn eitt ár síðani, at felagsskapurin bað um stuðul til keyp av útgerð, ið kann verja ímóti herviligu smittuni. Og undirtøkan millum norsku stuðlarnar hevur verið serstakliga góð.
– Nú eygleiða vit, hvussu teir ymisku smittandi variantarnir spjaða seg við risafetum, millum tey, sum eru í størsta smittuvanda í Afrika.
– Ja, meðan eg skrivi hesar reglurnar, eru 30 afrikansk lond í vanda fyri at fáa eina nýggja bylgju av korona. Í summum londum er smittan tvífaldað eftir stuttari tíð, sigur Roger Vassnes (myndin).
Og hann leggur álvarsamur aftrat:
– Vit mugu bera skjótt at! Talið av fólki, ið verða innløgd er økt við 40 prosentum!
(Lesið eisini greinina frá 20/10-21, har føroyska deildina av Africa Mercy hevur latið 250.000 krónur til at basa korona í Afrika – https://mercyships.fo/uncategorized/250-000-foroyskar-kronur-til-stridid-moti-korona-i-afrika/page/0 ).

ØLL Í SAMA BÁTI
Roger Vassnes heitir í roynd og veru á øll um at gera sítt til, at hetta smittandi frábrigdið ikki spjaðir seg við deyðiligari og skjótari ferð gjøgnum nøkrum av heimsins mest viðbreknu økjum.
– Hesin skjóti vøksturin av smittutilburðum í Afrika hóttir tey allarveikastu – tey gomlu og sjúklingar, sum frammanundan líða av álvarsomum sjúkum.
– Nógv teirra hava frammanundan eina veika immunverju, og eru tí í enn størri vanda fyri at gerast álvarsliga sjúk, um tey fáa smittuna, leggur hann dent á.
Longu nú merkja sjúkrahúsini til tørvin á heilsustarvsfólkum. Um hesi starvsfólkini ikki skjótt vera vaksineraði, fer tað bara at økja um trupulleikarnar.

RÆÐULIGUR VERULEIKI
Roger Vassnes vísir á, at tey – ella vit – sum eru vorðin vaksinerað, merkja ein lætta, at tú og tín familja eru vard.
Afrika er aftarlaga í kø’ini, tá talan er um at útvega vaksinuna. Tað vilja vit gera nakað við!
Fjarstøðan í heimin minkar alsamt, meðan smittan ferðast skjótt frá einum landi til hitt. Tí vera vit eisini rakt av tí, sum hendir í Afrika. Vit eru í roynd og veru í sama báti – hvør einasti okkara.
Nógv okkara hava kanska merkt til stressið, um smittan er í nánd av økinum, har tú býrt.
– Dugir tú at ímynda tær, at tú fekst at vita, at til er ein vaksina sum kann verja teg og familju tína – men at tað bar ikki til at fáa hendur á henni?
– Júst hetta er tann ræðuligi veruleikin fyri milliónir av afrikanarum.

SKJÓT HJÁLP
Norska deildin í Mercy Ships heitir tí á fólk um stuðla arbeiðinum at fáa vaksinurnar út til staðbundnu heilsumiðstøðirnar í Afrika.
Her verður eisini skipað fyri upplæring av heilsustarvsfólkum, og hvussu ein handfer hesa dýrabaru vaksinuna, sum skal kølast niður, sjálvt í teim heitastu londunum í Afrika.
Henda gávan kann eisini gera sítt til at kunna fólk í heimsins mest óframkomnu økjum um at vaksinan er ávegis, og at tey eru trygg.
– Um vit bera skjótt av, kunnu vit verja tey mest viðbreknu, vísir Roger Vassnes á.
(Kelda: mercyships.no)

Føroyska deildina av missiónsfelagsskapinum Mercy Ships er við til at hjálpa heimsins fátækastu við koppseting móti koronu og hjálpa teimum, sum eru komin illa fyri.

Tað er ikki bert í Føroyum at korona-smittan av álvara er farin at gera um seg aftur.
Er støðan álvarsom í okkara landi, har tað beint nú, tá hetta verður skrivað – seinnapart leygardag, 30. oktober – eru 634 smittaði, 701 í sóttarhaldi og 5 innløgd á Landssjúkrahúsinum.
Í Føroyum hava vit nóg mikið av koppingarevnum, men soleiðis er ikki í fleiri – fyri ikki at siga: flestu – afrikanskum londum..

Júst her eru Mercy Ships og sjálvbodna manningin umborð á Africa Mercy í dag í ferð við at gera eitt stórt og týdningarmikið arbeiði, til tess at basa hesi herviligu sjúkuna, sum allastaðni krevur síni offur.
Men Mercy Ships gera ikki hetta umfatandi arbeiðið einsamalt, tí felagsskapurin samstarvar við aðrar felagsskapir í hesum týdningarmikla arbeiði.
Alt hetta kostar sjálvandi pening, og uttan góðar stuðlar hevði hetta als ikki borið til. Tað er í hesum sambandi, at føroyska deildin hevur valt at stuðla arbeiðinum við koppsetingini við ikki færri enn 250.000 krónum.
Hesin peningur er avgjørt neyðugur fyri, at koppsetingin kann vera gjørd millum heimsins fátækastu, samstundis sum ein tryggjar sær at heilsustarvsfólkini umborð og í landi trygt kunnu gera teirra arbeiði.
– Vit takka tykkum í Føroyum fyri at tit ynsktu at stuðla hesum arbeiðinum við eini so stórari upphædd. Hetta vekir bæði virðing og undran hjá okkum, sigur forkvinnan í donsku deildini av Mercy Ships, Randi Mondorf í takkarskrivi.
Peningurin fer óskerdur til hetta arbeiðið.

23 LOND
Upplýst verður, at Mercy Ships so avgjørt vil vera við til at basa hesi herviligu sjúkuni, og hevur tí avgjørt at fara í samstarv við onnur.
Peningurin, sum latin er úr Føroyum, fer tí til arbeiðið at útflýggja koppingarevni, at venja heilsustarvsfólk og at læra upp staðbundin fólk at taka sær av hesum arbeiðinum í samanlagt 23 londum í Vestur- og Miðafrika.
Randi Mondorf upplýsir, at tey arbeiða somuleiðis við at upplýsa fólk úti um landið um týdningin av at lata seg kanna, vera koppsett, og ja, – eisini at hava álit á arbeiðinum, sum verður gjørt umborð á skipinum og í landi.
Nevnast kann í hesum sambandi, at skip teirra – Africa Mercy – nú verður dagført og umvælt, soleiðis at tað enn einaferð kann leggja at við bryggju í høvuðsstaðnum í Senegal, Dakar, í februar komandi ár.
Samstundis síggja tey fram til, at nýggja skipið hjá Mercy Ships, nevnt Global Mercy, fer í sigling komandi ár.

Les um, hvussu eitt uppslag á Facebook vísti norðmanninum, hvørja leið hann skuldi halda.

Vit kenna tað frá føroysku sjóvinnuni, og tað er í roynd og veru ein sjálvfylgja: Fært tú ikki manning til eitt skip, ber ikki til at leggja til havs.
Sama støðan ger seg galdandi, tá talan er um at útvega manning til Africa Mercy, heimsins størsta hospitals-skip.
Fleiri fólk úr Norðurlondum hava mynstrað umborð her í styttri ella longri tíð, – eisini føroyingar.
Ein teirra, sum veit nógv um lívið umborð á Africa Mercy er norðmaðurin Kjell Roar Vik, sum hevur havt dagliga yrkið sítt í maskinrúminum umborð.
Hann er vaksin upp úti við havið, og hevur altíð dámað væl at rokast í báti. So tað var tí ikki so løgið, at hann endaði umborð á tí stóra hospitals-skipinum.

AT GERA MUN
Tað var tí heldur ikki undarligt, at onkur setti honum henda viðkomandi spurningin:
– Altso, Kjell Roar, tú ert ein ungur maður úr Veavågen. Hví í víðu verð fórt tú umborð á Africa Mercy at arbeiða sjálvboðin og óløntur?
Veavåg er ein lítil bygd við umleið 3000 íbúgvum, beint norðanfyri Stavanger. Her vaks hann upp í einum trúgvandi heimi og hevur altíð verið trúgvandi.
Men aftur til spurningin: – Jú, amerikanska kona hansara Lara, sum sjálv er uppvaksin (!) umborð á Africa Mercy og Kjell Roar sjálvur høvdu bæði eitt kall um at kunna arbeiða umborð á skipinum.
– Eg eri úr eini bygd, har fólk vanliga búgva í langa tíð. Men tá eg var 18 ára gamal fór eg umborð á Mercy Ships sum maskinlærlingur í 10 mánaðir.
– Og her fann eg eisini kærleikan í mínum lívi, og vit bæði tosaði beinanvegin um at fara umborð aftur á skipið, hava tey bæði áður greitt frá í einum bloggi um lívið umborð.
Kjell Roar visti eisini beinanvegin, tá hann fór í land, at hann fór at koma aftur. Og rætt var!
– Ja, tað var heilt serstakt at arbeiða umborð, samstundis sum ein gjørdi mun fyri onnur. Hetta hevur nógv størri týdning fyri meg, enn tað at fáa eina fasta løn hvønn mánað.
– Nógv menniskju hava nógv at stríðast við. Her umborð kunnu tey fáa ta hjálpina, sum tey hava bíðað alt ov leingi eftir.
– Eg ynskti í øllum førum gera mítt til og syrgja fyri, at tey, sum høvdu størstan tørv á hjálp, skuldu fáa hana, sigur hann.

HJÁLP AT VELJA RÆTT
Sum tað skilst omanfyri, hevur Kjell Roar altíð havt hug at arbeiða við missión. Tá hann var liðugur at læra, umhugsaði hann eina løtu í lesa gudfrøði.

– Men tað kendist ikki heilt rætt. Eg visti væl, at Mercy Ships hevði tørv á maskinmonnum, so eg bað Gud um hjálp til at velja tað rætta: Skuldi eg gerast gudfrøðingur ella maskinmeistari?
– Ein váttan í so máta, og sum mær tørvaði júst tá, kom til mín sum eitt snarljós á Facebook, greiðir hann víðari frá.
Har var ein søga frá Africa Mercy, har teir beinleiðis søgdu: ”We need marine engineers!” (vit hava tørv á maskinmonnum).
Hann fekk sær neyðugu útbúgvingarnar, gekk í hjúnalag við Lara, og stutt eftir vóru tey bæði búgvin til at fara aftur til hospitals-skipið við fyrsta flogfari.

– Eitt lærdi eg umborð á Africa Mercy, og tað var, at hóast eg rindaði fyri uppihaldið, so fekk eg, hóast alt, ”løn” fyri stríðið. Hetta sæst ikki á konto’ini í bankanum, men sæst aftur í smíli, látri, einum klemmi, gleðistárum og takksemi, sigur norska Lise Vy Quyen.

Hon býr í norska býnum Tróndheim. Hennara hægsta ynski var at betra um heilsustøðuna hjá menniskjum í triðja heiminum.
Soleiðis kom hon umborð á Africa Mercy, har hon var í seks mánaðir.
– Tað var í roynd og veru ein starvsfelagi á sjúkrahúsinum, sum fortaldi mær um Mercy Ships. Eg gjørdist forvitin og googlaði meg fram til heimasíðu teirra.
– Og tá satt skal sigast, rakti henda heimasíðan meg beint í hjartað, og eg skilti skjótt, at hetta var júst nakað fyri meg, greiðir Lise Vy Quyen frá.
Hon hevði longu í góðari tíð frammanundan – hetta var í 2013 – avgjørt, at árið 2014 skuldi gerast eitt meiningsfult og læruríkt ár.
Lise gavst við arbeiði sínum í Hammerfest og fór síðani til franska høvuðsstaðin Paris at fríska upp franska málið. Áðrenn hon fekk játtandi svar frá Mercy Ships, hevði hon verið við í hjálpararbeiði hjá felagsskapinum Compassion Vietnam.
Og í desember mánaði 2014 mynstraði hon umborð á Africa Mercy á Madagaskar, og var hon við her til nakað inn í 2015.
– Eg elskaði hetta arbeiðið umborð á hospitalsskipinum, her vit vóru við til at geva vón og heilsuhjálp til nøkur av heimsins gloymdu og fátæku fólkum, hevur hon síðani greitt frá.

TAKKSEMI
Meðan Lise Vy Quyen var umborð á Africa Mercy slapp hon at brúka sína útbúgving. Men umframt hetta kom hon at kenna menniskju úr øllum heiminum.
– Eg fari altíð við takksemi at minnast alt tað, sum vit upplivdu umborð.
– At liva uttanfyri mína egnu mentan, hevur givið mær ta avbjóðingina at síggja alt frá fleiri síðum. Eg havi ment meg sum bio-ingeniør, samstundis sum eg eri vaksin í míni egnu trúgv, greiðir hon frá.
Eitt annað serstakt við at vera umborð á skipinum er, at øll manningin arbeiðir við einum felags ynski um at hjálpa øðrum.
– At arbeiða á rannsóknarstovuni sum bio-ingeniørur er ein makaleys og gevandi uppliving. Eg slapp millum annað at gera analysur av lívrunnum evnum, staðfesta mikroorganismur og ávísa sjúkur.
– Tú skalt faktist leita leingi eftir einum meiri áhugaverdum starvi sum bio-ingeniørur enn hetta!

GAV SÍTT EGNA BLÓÐ
Eitt annað av arbeiðum hennara var at kanna alt blóðið, sum blóðgevararnir lata.
Alt blóðið kemur frá manningini umborð, og tí var eitt av arbeiðum hennara at halda skil á hesum serstaka blóðbankanum.
– Eg var sjálv blóðgevi. Tað var serligt at vera við í hesi menningini, gera kanning av mær sjálvari, fáa ”semju” millum mítt blóð og tí hjá sjúklinginum, og síðani lata blóðið beinleiðis til móttakaran.
– Hetta hevði minst líka stóran týdning fyri meg sum fyri tey, sum fingu blóðið, sigur Lise Vy Quyen.

7,5 LITRAR AV BLÓÐI
Lise greiðir víðari frá, at hon var eisini á vakt, tá Sambany fekk sína stóru skurðviðgerð, har ein knykil, sum vigaði 7,5 kilo var tikin burtur – sí myndina omanfyri, og annars søgu nr. 10 á heimasíðuni, har greitt verður frá umstøðunum hjá Sambany fyri og eftir skurðviðgerðina.
– Vit vistu øll, at hetta fór at gerast ein drúgvur dagur. Men eingin okkara hevði minsta ánilsi av, at skurðviðgerðin skuldi taka samfullar 12 tímar.
– Sambany hevði brúk fyri nógvum blóði, og eg hevði úr at gera við at útvega alt blóðið frá bankanum, har tað ofta stóð á at nøkta tørvin, greiðir hon frá.
Brúk var fyri meiri enn 7,5 litrum av blóði til henda djarva mannin, sum gjørdist púrasta frískur aftaná.
Blóðið fekk hann frá íalt 17 blóðgevarum frá seks ymiskum londum, millum annað frá Noregi!
– Eg havi aldrin áður merkt eina líknandi arbeiðsgleði ella arbeiðshug sum hesaferð.

LØN FYRI STRÍÐIÐ
Lise Vy Quyen greiðir frá, at tað hevur merkt ótrúliga nógv fyri hana, at hava verið partur av hesum hugtakandi arbeiðinum, sum Mercy Ships ger fyri fólk í triðja heiminum.
– Eg havi sæð týdningin av bøn og stuðli gjøgnum tíðina umborð á Africa Mercy. Øll skilja tó ikki, hví eg sjálv mátti gjalda fyri at vera við í hesum arbeiðinum.
– Men eg lærdi tó eitt, at eg, hóast alt, fekk løn fyri stríðið. Hetta sæst ikki á konto’ini í bankanum, men sæst aftur í smíli, látri, einum klemmi, gleðistárum og takksemi.
– Eg gav meg sjálva, men fekk nógv meiri við mær aftur, slær Lise Vy Quyen fast.