Bruni var komin í sárið hjá Jimmy, tá Mercy Ships hittu hann á Madagaskar í 2015. Sum ungur fekk hann eina brenning, hvørs sár ongatíð fingu røttu viðgerðina. Tørvurin á viðgerð førdi við sær, at eiturevni spjaddust kring alt likam hansara, og pínan var øgilig.
Sjúkrasystirin Vivien hitti Jimmy fyrstu ferð hon var á stovugongd. Hetta var stutt eftir at hann var innlagdur á sjúkrahússkipinum.
– Annað bein hansara var tikið dagin fyri. Hann var 28 ára gamal, bert fá ár yngri enn eg. Eg væntaði at síggja ein hugtungan mann, men eg hitti ístaðin tað størsta smílið eg havi sæð. Hann helt á at takka okkum, tí vit høvdu hjálpt honum.
Tøkan av beininum gjørdist samstundis endin á nógvum pínufullum árum.
– Eg elskaði hansara positiva sinnalag, minnist Vivien aftur á. – Hóast hann hevði verið ígjøgnum so nógv, lýsti kærleikin av honum. Tað bleiv til nógv klemm, nógvan látur og prát, teir mánaðirnar hann var innlagdur her.
Tá Jimmy var komin fyri seg eftir skurðviðgerðina, arbeiddu toymini við endurvenjing og verkfrøði hjá Mercy Ships at gera honum eina protesu.
– Nú hevði hann ein møguleika at fáa eitt vanligt lív. Hann var haraftrat sera hugtikin yvir møguleika sín at kunna fáa sær eitt arbeiði, eins og onnur.