Skjótt kann heimsins størsta sivila sjúkrahússkip ”Global Mercy” fara á sín fyrsta túr. Hesin verður eftir ætlan stutt eftir ársbyrjan í 2022.
Skipið legði frá landi og til havs, her ein ynskti at hyggja eftir, hvussu tað riggar undir slíkum umstøðum, samstundis sum ein tjekkar av, hvussu øll útgerðin virkar.
– Vit kunnu í dag boða frá, at okkara nýggja sjúkrahússkip hevur staðið allar royndir á hesum túrinum, sigur Randi Mondorf, forkvinna í stýrinum í donsku deildini í Mercy Ships.
– Nú fara vit undir at gera skipið liðugt innan, og her hugsa vit serliga um sjúkrahúsið og útgerðina, ið tey skulu brúka har, áðrenn skipið fer í sigling at veita ókeypis læknahjálp til menniskju í neyð.
Áðrenn tey koma so langt, skal skipið liggja við bryggju í belgiska býnum Antwerpen eina tíð, har alt tað, sum hoyrir til sjúkrahúsið umborð skal setast upp. Eftir tað fer skipið til Rotterdam, áðrenn lagt verður frá landi á fyrsta túrin, sum verður til høvuðsstaðin í Senegal, Dakar, í januar næsta ár.
Nevnast kann, at umborð eru seks skurðstovur og eitt sjúkrahús, sum kann hava 200 sjúklingar. Umborð er annars pláss fyri 950 fólkum, tá tey liggja við bryggju, íroknað manningina, ið telur 641.
Nýggja skipið ”Global Mercy” er systurskip til gomlu donsku jarnbreytarferjuna ”Dronning Ingrid”, sum felagsskapurin ognaði sær í 1999.